Ky liber i kushtohet fisit Daci në fshatin Zogje të Dibrës. Autori, Bashkim Lleshi është përpjekur të japë një tablo sa më të gjerë për vendndodhjen e fshatit, lagjet dhe fiset, toponimet, tokat arë, përrejtë e burimet, banorët më të vjetër: Suti, Kaja, Lila, Mena deri tek Markja, Leka, Lleshi, Krrusa, Daci, Hasani, Caka e Toçi. Në mënyrë të detajuar përshkruhet fisi Daci në lagjen Kodras të fshatit Zogje të Grykës së Vogël, lëvizjet në Shupenzë, Gjoricë, Dibër e Madhe, Tiranë etj., ku kanë migruar për një jetë më të mirë.
Të dhënat për të shkruar këtë libër kanë filluar të mblidhen në fillimet e viteve 2000, gjatë kohës që autori mblidhte të dhëna për të shkruar librin e fisit Lleshi, i cili u botua në vitin 2012. Ky libër do t’i shërbejë brezit të sotëm, për t’u njohur me prejardhjen e të parëve, me punën e përpjekjet e tyre për të ardhur deri në ditët e sotme.
