Kalila dhe Dimna, një nga librat më të famshëm që është shkruar ndonjëherë, një bestseller për pothuajse 2000 vite dhe një libër që ende lexohet me kënaqësi në gjithë botën. Ai është përkthyer të paktën 200 herë në 50 gjuhë të ndryshme. Libri “Kalila dhe Dimna” u shkrua nga dijetarët e Indisë. Që nga ajo kohë, shkencëtarët dhe dijetarët e të gjitha vendeve janë përpjekur të mësojnë dhe të mençurohen prej tij dhe kanë vrapuar të vënë në jetë mësimet dhe përvojat që përmban ky libër. Ata janë përpjekur që, me anën e këtij libri, të gjejnë dhe të shërojnë të metat e tyre, pavarësisht se tregimet dhe historitë janë vënë në gojën e kafshëve dhe të zogjve, duke u dhënë atyre veti njerëzore. Libri përmban në vetvete njohuri dhe kulturë të gjerë, si dhe mjaft histori argëtuese. Dijetarët e vlerësonin dhe e kërkonin atë, pikërisht për këto njohuri, ndërsa njerëzit e zakonshëm për anën e tij argëtuese. Njerëzit e arsimuar, që ranë në kontakt me tregimet e këtij libri, u përpoqën të mbanin mend ngjarjet, me qëllim që t`i lidhnin me jetën dhe përvojën e tyre.
