"Pema gjenealogjike e familjes Shehu të Peshkopisë" është një nga punët më të bukura që Muniri i la Dibrës, Peshkopisë e sidomos fisit të tij: Shehlerëve të Peshkopisë. Në veprat e krijuara prej tij, si mësues, historian, folklorist e kompozitor i shumë këngëve e valleve dibrane, matjane etj., që kanë hyrë në fondin e artë të muzikës popullore shqiptare, sigurisht, pema gjenealogjike, qëndron si qershia mbi tortë. Gjenealogjia e fisit Shehu të Peshkopisë nuk është vetëm personale dhe nuk duhet konsideruar si e tillë, pra, thjesht e fisit. Me të dhënat që sjell për një nga familjet më të vjetra, e cila ka rolin e saj të padiskutueshëm në historinë e qytetit të Peshkopisë e më gjerë, pema, mund dhe duhet të shërbejë si një dokument i rëndësishëm historik kur bëhet fjalë për lindjen e më pas zhvillimin e qytetit të Peshkopisë e më gjerë, për zhvillimin dhe historikun e fesë ndër këto anë, si evoluon ndryshimi i emrave në periudha të ndryshme, etj.
