Kliton Nesturi kthehet pas gati një çerek shekulli me vëllimin poetik "I lindur bohem", pas vëllimit "Eldorado" botuar në vitin 1997.
Rikthimi te poezia është si "Të kthehesh në Atdhe", e cila është poezia që paraprin 5 ciklet poetike të vëllimit: Në udhë, Fija e flokut tënd, Blloku i vjetër i trishtë, I lindur bohem dhe Udhëtim drejt vetvetes.
"I lindur bohem" është një vëllim poetik i shtrirë në kohë dhe hapësirë, që trajton problematika të kohës së sotme, por që bashkohen bashkë te poeti jo vetëm në krijimin, dashurinë, ndjeshmërinë ndaj së bukurës dhe të mirës; por edhe që shfaq jokonformizëm me realitetin, herë-herë edhe si formë rebelimi.
Poezitë e këtij vëllimi shfaqen në shumëllojshmëri temash, vargjesh, emocioni dhe muzikaliteti, duke ndjerë përmes leximit përmasat e lirisë së individit, "pa litar rreth qafës dhe rob i askujt".
