Radiografi e shtresave sociale të kryeqytetit me problemet e trazuara ashtu siç s’mundemi t’i shohim në ecjen monotone të jetës së përditshme. Konstruksion metalik tepër i ndryshkur i strukturës moderne shoqërore. Elita shoqërore, me etjen e saj të pashuar për fitim maksimal. Synim mbisundues, agresiv, gjithmonë e më i egër dhe pa asnjë lloj hezitimi ndaj normave të moralit shoqëror. Pasuria e luksi mbi gjithçka humane. Gangrenizim social që rrezikon të ardhmen. Kontrast i theksuar bardhë e zi, në anën tjetër skicohet me penelata të dhimbshme varfëria, mjerimi, papunësia.Të varura si enigma të pazgjidhshme në garderobën me përmasa gjigante të popullit. Stresi e ankthi njerëzor hekurosur si kostum i pazëvendësueshëm në pasarelën e rrugëtimit për mbijetesë. Ekspozuar nën drita të fuqishme, diga ndarëse shoqërore. E paprekur nga tërmeti që shkatërroi diktaturën. Demokracia, shpresa, drejtësia - të hedhura në plehrat e humnerës së pafund të humbjes. Dielli dhe e vërteta, të burgosura e të fshehura qëllimisht në katakombet e Malit të Dajtit. Zgjidhjet dhe zgjedhjet të ruajtura në kasafortat e blinduara të kompromiseve e manipulimeve politike. E ardhmja që pret me durim shekullor të vendoset si nocion në fjalorin enciklopedik shqiptar.
