Jo më kot thuhet në popull: “Fjala shëron!”. Por edhe mendimi “shëron”. Një jetë të tërë si mjek kam kuptuar se jo çdo gjë arrihet vetëm me medikamente.
Prandaj e mora nismën të shkruaja këtë libër, i cili ne thelb është një përmbledhje e ndërthurur e thënieve dhe metodave autosugjestionuese nga psikoterapistët më të shquar, gërshetuar me eksperiencën time personale ndër vite.
Mënyra se si ne reagojmë ndaj ambientit që na rrethon dhe situatave apo ndodhive është e ndryshme. Një pjesë e madhe e individëve, të rritur në familje të shëndetshme, kanë fituar që në moshë të vogël mekanizma të fuqishëm psikologjikë për një funksionim të shëndetshëm psikologjik, i cili i mbron ata nga sëmundjet mendore dhe i bën të përballojnë me sukses sfidat e jetës, qoftë edhe sëmundjet. Por jo të gjithë individët kanë një funksionim të shëndetshëm psikologjik…
Realiteti ynë kushtëzohet në një pjesë të konsiderueshme nga mendimet tona, të cilat më pas bëhen zakone, që më pas na diktojnë fatin tonë.
Prandaj një mënyrë për të ndryshuar fatin e keq apo mënyrën se si ndihemi është të ndryshojmë mënyrën e të menduarit dhe perceptimin tonë për realitetin që na rrethon.
Këtë teori e kam shtjelluar gjerësisht në libër, duke u bazuar edhe mbi 5 parimet kryesore të mendimit pozitiv.
Shpresoj që ky libër t’i ndihmojë sadopak lexuesit që të ndryshojnë mënyrën e tyre të të menduarit, për të pasur një jetë sa me të lumtur.
Falënderoj pacientët e mi për gjithë eksperiencën që kam fituar prej tyre, për kënaqësinë profesionale që më kanë dhënë në punën time dhe, së fundmi, familjen time, pa mbështetjen e së cilës nuk do të isha ky që jam sot.
