“Si ia bën të më thuash aq shumë, pa më thënë një fjalë” (nga një poezi e autores)
Vargu “Si ia bën të më thuash aq shumë, pa më thënë një fjalë”, vendosur edhe si titull i një poezie të autores, mund riformulohej edhe si pyetje për vetë poeten: Si ia bën të më thuash aq shumë, me vetëm pak fjalë. Ailda na thotë dhe na ka dhënë shumë përmes poezisë së saj.
Botimet “M&B”, pas botimit të librit të parë me titullin intrigues “Thuajsë”, publikojnë në Tiranë vëllimin e dytë poetik “Fllad” të Ailda Mëngjesi. Autorja është një profesore e asociuar dhe pedagoge në “Rush University Chicago”, SHBA. Letërsia është një pasion shumë më i hershëm i saj, shumë më i hershëm sesa profesioni i mjekes që po e ushtron larg atdheut. Madje, falë edhe mjeteve të virtuale të internetit mund të thuhet se poezia është bërë te ajo një mënyrë të menduari dhe komunikimi me fansat e saj në Shqipëri.
